Alicia (I)

Levaba catro días chovendo con forza. Alicia decidiu que aquela mañá, pasase o que pasase, cruzaría cara o outro lado do mundo que se vía dende a súa ventá. Ao primeiro dáballe algo de medo atoparse con aqueles estraños seres que levaba observando había máis de catro anos (cada minuto, cada momento do día, cada hora roubada ao sono), pero logo comprendeu que se non saía agora nunca o faría.

Lavou o cabelo moi a modiño, con especial coidado, e deixou que a auga da ducha esvarase polo seu corpo longamente. Logo continuou co ritual de envolverse na toalla e esperar uns minutos estomballada na cama gozando da calor do corpo. Alí, cos ollos pechos, repasou a roupa que había no seu armario pensando no que debía poñerse. nin se lle pasou pola cabeza que aquelas prendas xa non lle servisen. Cambiou as súas decisións unha e outra vez demorando o momento de enfrontarse á rúa ateigada de xente. Finalmente decidiu poñer o vestido azul. Víase tan fermosa con el! Ergueuse e aínda secou o pelo antes de almorzar. Un moito de café, un pouco de leite, un nada de azucre, un rebordar de ansiedade pola cunca abaixo.

__________________________
A foto foi unha cesión de ababoll que as ten superchulas no seu blog.
grazas miña Eme (te añoroooo)